Янгиликлар
РАСМИЙ МУНОСАБАТ!
РАСМИЙ МУНОСАБАТ! “ЁЗИШДАН ОЛДИН ЎЙЛАНГ!” “Telegram” ижтимоий тармоғидаги “ХАЛҚ НАЗОРАТИ” блогида 2026 йил 24 май куни даҳо ижодкор, машҳур инглиз шоири ва драматурги Уильям Шекспирнинг 11 та доҳиёна ҳикматлари келтириб ўтилган. Улардан бири ушбу Расмий муносабатимизга сарлавҳа сифатида танланди: “Ёзишдан олдин ўйланг!”Орадан атиги бир кун ўтиб, 25 май куни “халқ назорат”чилари даҳо шоирнинг ҳикматига қулоқ солмасдан, Судьялар олий кенгаши раисига тоғам деб мурожаат қилиб, “шу судьяларни сиз тайинлагансиз-а?” қабилида савол қўймоқда!Саволнинг бундай қўйилиши нотўғри: судьяни фақатгина Кенгаш раисининг бир ўзи тайинламайди. Судьялар олий кенгаши коллегиал орган бўлиб, унинг доимий асосда фаолият юритадиган 13 та, жамоатчилик асосида 7 та аъзоси бор. Судьялик лавозимларига тайинлаш Кенгаш аъзоларининг кўпчилик овози билан ҳал этилади. Ушбу постдаги иддаога кўра, судья хато қилганлиги учун у айбдор эмас, уни лавозимга тайинлаган Кенгаш айбдор. (Гўёки жиноятчи эмас, унинг қилмиши учун отаси айбдор, агар у шу жиноят содир этган шахснинг дунёга келишига сабабчи бўлмаганида эди, ушбу жиноят содир этилмаган бўлар эди, деганга ўхшаш мантиқан нотўғри тушунча.)Кимки, суд кароридан норози бўлса, марҳамат юқори суд инстанциясига мурожаат қилиши мумкин. Ишдаги норози тараф аризасигина ишни кўриб чиқиш учун асос бўлади. Процессуал кодексда “ижтимоий тармоқ орқали берилган мақола ишни кўриш учун асос бўлиши” белгиланмаган.Агарда суд қайсидир иш бўйича амалдаги процессуал тартибга риоя этмасдан шикоятни иш юритувига қабул қилган бўлса, бунга ҳам фақат ва фақат юқори турувчи суд баҳо беради. Суд томонидан қонун нотўғри қўлланилгани аниқланса, юқори суд инстанцияси муносабат билдиради...Ҳурматли, "ХАЛҚ НАЗОРАТИ" блоги вакили, ёзишдан олдин ўйланг!
Авлодлар мулоқоти: ёшларни эзгуликка даьват этади
Жорий йилнинг 23 май куни Сирдарё вилояти, Ховос туманидаги 1-умумтаълим мактабида Ўзбекистон Республикаси Судьялар олий кенгаши ташаббуси билан навбатдаги маънавий-маърифий учрашув ташкил этилди. “Авлодлар учрашуви” деб номланган мазкур тадбир ушбу таълим муассасасининг 1969 йилдаги фахрли битирувчиси, таниқли давлат ва жамоат арбоби, ҳуқуқшунос олим, Ўзбекистон Республикаси Конституциявий суди раиси Мирзо-Улуғбек Элчиевич Абдусаломовнинг ибратли ҳаёт йўли ва кўп йиллик самарали фаолиятига бағишланди. Маърифий тадбирда Олий Мажлис Қонунчилик палатаси депутатлари, Судьялар олий кенгаши ходимлари, Сирдарё вилоят ва Ховос туман судлари раислари, Ховос тумани ҳокимияти раҳбарияти, ҳуқуқни муҳофаза қилувчи органлар раҳбарлари, суд тизими фахрийлари, мактаб жамоаси, шунингдек, Мирзо-Улуғбек Элчиевич билан бир даврда, бир партада бирга таҳсил олган қадрдон синфдош дўстлари иштирок этдилар. Тадбир давомида сўзга чиққан нотиқлар М.Абдусаломовнинг суд-ҳуқуқ тизимидаги кўп йиллик машаққатли меҳнати бугунги ёшлар учун чинакам ибрат мактаби эканини алоҳида таъкидладилар. У кишининг шарафли ҳаёт йўли ва фидокорона хизматлари ёш авлод учун катта сабоқ вазифасини бажариб, уларни ҳам келажакда юксак инсоний фазилатларга эга яхши инсон, малакали мутахассислар бўлиб етишишларига ундайди. Учрашувда мактабнинг фаол, билимли ва зукко ўқувчилари томонидан Ватан, адолат ва устозларни улуғловчи чиройли шеърлар маҳорат билан ўқиб эшиттирилди. Бу эса тадбирга янада кўтаринки ва байрамона руҳ бағишлади. Очиқ ва самимий мулоқот тарзида ўтган учрашувда бир қатор мактаб ўқувчилари ҳам сўзга чиқиб, мактабдош Устозига муносиб авлод бўлиб етишишларига аҳд қилишганини таъкиблаб ўтишди. Мазкур маърифий тадбир юксак давлат ва жамоат арбоби даражасигача кўтарилишнинг сири – тинимсиз меҳнат ва интилиш, билим олишда эканини ёшлар қалбига сингдиришда ҳамда ўқувчиларни ҳам янги марралар сари руҳлантиришда муҳим амалий аҳамият касб этади.
Turkiy davlatlar tashkiloti Sudyalar kengashlari rahbarlarining IV yig‘ilishi ishtirokchilariga murojaat
Hurmatli anjuman ishtirokchilari! Avvalambor, siz, azizlarni turkiy sivilizatsiyaning qadimiy markazlaridan biri bo‘lgan ko‘hna va hamisha navqiron Samarqand shahrida chin dildan tabriklashdan baxtiyorman. Hech shubhasiz, ushbu yig‘ilishning doimo adolat tamoyillariga tayanib ish yuritgan Sohibqiron Amir Temur saltanatining poytaxtida, ul zotning 690-yillik qutlug‘ tavallud sanasi xalqaro miqyosda keng nishonlanayotgan kunlarda bo‘lib o‘tayotgani anjumanga alohida shukuh bag‘ishlamoqda. Jahon hamjamiyatidagi o‘rni va nufuzi tobora ortib borayotgan Turkiy davlatlar tashkilotining bugungi kunda turkiy birlik va taraqqiyot borasida muhim rol o‘ynayotgani barchamizga yuksak g‘urur va iftixor yetkazadi. Muhtaram do‘stlar! Turkiy davlatlar tashkiloti faoliyatida qonun ustuvorligini ta’minlash, samarali boshqaruv va inson huquqlarini himoya qilish masalalari alohida o‘rin tutadi. Ayniqsa, dunyoning geosiyosiy xaritasida tub o‘zgarishlar yuz berayotgan, qarama-qarshiliklar ko‘lami, nizolar kuchayib borayotgan hozirgi murakkab vaziyatda ana shu masalalarni birgalikda muhokama qilish va bu borada samarali yechimlar topish dolzarb ahamiyatga egadir. Albatta, mamlakatlarimiz hayotida adolat va qonun ustuvorligini ta’minlovchi, inson huquqlarini himoya qiluvchi va kuchli sudyalar korpusini yaratishda Sudyalar kengashlaridan umidimiz katta. Ayni shu jihatdan qaraganda, bugungi yig‘ilish kun tartibiga kiritilgan masalalar Kengashlarning istiqboldagi faoliyatida yangi yo‘nalishlarni belgilab beradi, deb ishonaman. Xususan, anjuman doirasida imzolanishi kutilayotgan A’zo davlatlarda Sudyalar odobining umumiy prinsiplari to‘g‘risidagi o‘zaro anglashuv memorandumi turkiy xalqlarning tarixiy-huquqiy an’analari umumiyligi va sud tizimlari o‘rtasida mushtarak axloqiy mezonlar hamjihatligini mustahkamlashga xizmat qiladi. Shuningdek, bu muhim hujjat sudyalarning xalqaro miqyosda e’tirof etilgan xulq-atvor mezonlarining ahamiyatini e’tirof etib, milliy huquqiy an’analarga hurmat bilan yondashishni ham ko‘zda tutadi. Ta’kidlash lozimki, joriy yilning 6-mayida Toshkentda bo‘lib o‘tgan Odil sudlov akademiyalari forumida sud-huquq sohasida turkiy davlatlar ta’lim tizimini tashkil etishning minimal standartlariga oid xalqaro hujjat qabul qilindi. Bu mamlakatlarimizda sudyalarni tayyorlashning yangi va universal tizimini joriy etishga qaratilgani bilan, ayniqsa, diqqatga sazovordir. Qadrli anjuman qatnashchilari! Sizlar Samarqand yig‘ilishida barcha davlatlar uchun ustuvor vazifalardan biri bo‘lgan qonun ustuvorligini ta’minlash hamda inson huquqlarini himoya qilishdek ezgu maqsadlar yo‘lida salmoqli natijalarga erishasiz, deb ishonaman. Eng muhimi, bunday forumlar mamlakatlarimiz o‘rtasida strategik sheriklik, xalqlarimiz orasida yaqin do‘stlik va qardoshlik rishtalarini yanada kuchaytirishga, turkiy dunyoning xalqaro maydondagi obro‘-e’tibori va nufuzini yuksaltirishga xizmat qilishi, shubhasiz. Sizlarni ushbu tadbirdagi ishtirokingiz bilan yana bir bor qutlab, g‘oyat sharafli va mas’uliyatli faoliyatingizda ulkan omadlar, mustahkam sihat-salomatlik, anjuman ishiga esa muvaffaqiyat tilayman. Shavkat Mirziyoyev, O‘zbekiston Respublikasi Prezidenti
Ишонч телефони
Сизда ариза, шикоят ёки таклифлар мавжудми? Судьялар олий кенгашига ишонч телефонлари орқали мурожаат қилинг!
71 200-26-00 ёки 1190