Янгиликлар
Меҳмонлар ҳаяжони, “саломга алик олмаган судьялар” ва “тишлаган жойини” узган битирувчи...
Ваколати якунига етган айрим судьялар навбатдаги муддатга тайинланди
Навбатдаги тайинловлар: қайси судьяларнинг иш жойи ўзгарди?
Яна бир ўқув курси якунига етди
Судья Эрметованинг янги китоби чоп этилди
Судья Шоира Эрметованинг янги китоби чоп этилди. Йўқ, китоб хос доира - ҳуқуққа оид эмас. Аксинча, мавзу ҳаммабоп ва оммабоп бўлиб, унда Ўзбекистон Қаҳрамони Эркин Умматовнинг ҳаёт йўли ҳақида ҳикоя қилинади. Публицист Ҳулкар Ҳотамбоева билан ҳамкорликда ёзилган ушбу асарда ўзига хос услуб, ширали тил ва нуктадонлик билан ҳамзамонимиз портретига чизги берилади. Эътиборлиси, китобда инсон садоатининг бош омилиги тинимсиз меҳнат ва изланишда эканини бир инсон ҳаёти мисолида ўқувчига етказишга ҳаракат қилинади. айтиш керакки, бунга муваффақ бўлинган ҳам. Дарвоқе, Қаҳрамон ҳақидаги китобга Қаҳрамон шоиримиз Абдулла Ориповнинг машҳур мисраси ном сифатида танланган: "Шундай яшар одатда одам". Куни кеча Жиззах политехника институтида “Шундай яшар одатда одам” китоби тақдимоти бўлиб ўтди. Эслатиш ортиқчалик қилмас - Шоира Эрметова иккита мутахассислик шаҳодатига эга: журналист, ҳуқуқшунос. Бир неча йил марказий оммавий ахборот воситаларида фаолият юритган. Судьялар Олий кенгаши ҳузурдаги Судьялар олий мактабининг илк битирувчиларидан. Айни пайтда фуқаролик ишлари бўйича Чирчиқ туманлараро судининг судьяси. Судьялар олий кенгаши матбуот хизмати
Бу ёғига оз қолди: ҳадемай ғалвир кўтарилади...
Судьялар олий кенгаши ҳузуридаги Судьялар олий мактаби магистратура тингловчилари амалиётининг (стажировка) иккинчи босқичи ҳам якунига етди. Бу жорий ўқув йили охирлаб, ҳадемай ғалвир кўтарилишини англатади. Биласиз, биринчи марта судьялик лавозимига тайинланиш учун Кенгаш ҳузуридаги Судьялар олий мактабида бир йиллик таҳсил шарт. Айни лавозимга даъвогарларнинг ёши ўттиз бешдан кичик бўлмаслиги ва суд-ҳуқуқ тизимида камида етти йиллик тажрибага эга бўлиши ҳам янги талаблар сирасига киради. Демак, Судьялар олий мактабини битирган тингловчи “беш минути кам судья” деганидир. Бироқ, бу битирувчиларга судьялик лавозими нақд дегани эмас. Олдинда давлат имтиҳонлари турибди. Ундан ўтиб, тегишли шаҳодатни олингач, яна бир синов кутади: судьялик лавозимга тайинланиш учун очиқ танловда қатнашиладики, бу энди алоҳида мавзу... Воқеалар ривожидан илгарилаб кетяпмиз, узр, тингловчиларнинг амалиёт ўтганига оид мавзуда гапни давом эттирсак. Икки босқичда ўтказилган амалиётлар уч ойдан кўпроқ вақтни олди. Кўринадики, таҳсил жараёнида назарий билимларини амалиётда қўллай олиш кўникмаларини шакллантиришга алоҳида эътибор қаратилмоқда. Бу мутлақо табиий, негаки, назария билан амалиёт уйғун келгандагина кутилган натижа эришилиши тажрибалардан аён. Амалиётнинг ҳар икки босқичи Тошкент шаҳри ва Тошкент вилоятининг пойтахтга туташ туманлари судларида ўтказилди. Бужараёнда ҳар бир тингловчининг борадиган жойи, вақти ва бириктирилган масъул судьягача аниқ-тиниқ белгилаб берилди. Амалий машғулотларнинг биринчи қисми биринчи инстанция судларида ўтгани, бунга кўпроқ вақт ажратилгани ўз-ўзидан тушунарли. Чунки, биринчи марта судьялик лавозимига тайинланган мутахассис ишни биринчи инстанция судидан бошлайди. Шу боис ўтган вақт мобайнида тингловчилар биринчи инстанция судларида ишлаш тартиби ва талабларини астойдил ўрганди. Тўғри, тингловчилар орасида бир неча йилдан бери судда ишлаётганлар (девонхона мудири, архивчи, судья ёрдамчиси вазифаларида) оз эмас. Бироқ бу уларда тажриба етарли эканини кўрсатмайди барибир. Суд идораларида ходим бўлиб ишлаш бошқа, судья сифатида ишлаш умуман бошқа-бошқа масаладир. Шундан келиб чиқиб, назарий билим ва кўникмалари етарли бўлмаган суд ходими амалиётда процессуал ҳамда моддий қонунчилик нормаларини қўллашда айрим қийинчиликларга дуч келади. Шу сабабли, Судьялар олий мактабида судьялик лавозимига тайёрлаш курсларида таҳсил олаётган номзодларга амалиёт бошлангунга қадар ўргатилган қонунчилик асосларини амалиётда қўллай олиш кўникмасини шакллантиришга, айниқса суд мажлиси жараёнида кутилмаган ҳолатлар, уларга ўз вақтида тегишли ҳуқуқий баҳо бериш, айниқса, турли шаклдаги таъсирларга қарши босиқ ва қонуний йўл тутиш каби анча ҳассос ва нозик жиҳатларга жиддий урғу берилди. Амалиётнинг иккинчи босқичида тингловчилар юқори инстанция судларида иш кўришнинг ўзига хос хусусиялари билан танишдилар. Йўқ, танишилдигина эмас, балки жараённинг бевосита иштирокчиларига ҳам айландилар. Эслатиб ўтамиз, поёнига етаётган ўқув йилида Судьялар олий кенгаши ҳузуридаги судьялар олий мактабида 75 нафар тингловчи таҳсил олмоқда. Уларнинг 25 нафари жиноят, яна шунчаси фуқаролик, 15 нафари иқтисодий ва 10 нафари маъмурий судлар ихтисослиги бўйича таҳсил олмоқдалар. Яна бир гап. Юқорида бўлажак судьяларнинг амалиёт ўтагани ҳақида ахборот берилди. Сирасини айтганда нафақат судьялик остонасида, балки айни лавозимга тайинлангандан кейин ҳам муттасил ўқиш ва ўрганиш талаб этилади. Шу боис ҳам Судьялар одоб кодексида судья ўз мажбуриятларини лозим даражада бажариши учун ўз малакаси ва касбий билимларини мунтазам ошириб бориши, амалий кўникмаларини ва шахсий фазилатларини такомиллаштириб бориши шартлиги алоҳида қайд этилган. Шу мақсадларда судья мустақил таълим олиш имкониятларидан фойдаланиши ва мунтазам равишда давлат малака ошириш тизимида қайта тайёргарликдан ўтиши керак. Бу дегани судьянинг амалиётда фаолият кўрсатишининг ўзи унинг малакаси ошиб боришини англатмайди, бунинг учун билим олиши ва малакасини ошириб бориши даркор. Судьялар олий кенгаши матбуоти хизмати
Навбадаги тайинловлар: айрим судьяларнинг иш жойи ўзгарди
Кеча бўлиб ўтган Судьялар олий кенгашининг навбатдаги йиғилишида Кенгаш ваколатига оид қатор масалалар қатори айрим судьяларни навбатдаги муддатга, ваколат муддати даврига қайта тайинлаш масалалари муҳокама этилди. Шунингдек, уч нафар судьянинг ваколатини муддатидан илгари тугатиш туғрисидаги масала ҳам кўриб чиқилиб, тегишли қарор қабул қилинди. Судьялар олий кенгаши қарори билан: Солиев Умиджон Махмудович – судьялик ваколати муддати даврига Андижон вилоят судининг жиноят ишлари бўйича судьяси лавозимига қайта тайинланди ва шу муносабат билан Андижон вилояти жиноят ишлари бўйича Шаҳрихон туман судининг судьяси лавозимидан озод қилинди. Рахимов Зарифжон Ахмадович – судьялик ваколати муддати даврига Андижон вилояти жиноят ишлари бўйича Жалақудуқ туман судининг раиси лавозимига қайта тайинланди ва шу муносабат билан Андижон вилояти жиноят ишлари бўйича Марҳамат туман судининг судьяси лавозимидан озод қилинди. Шералиев Улугбек Қодирович – судьялик ваколати муддати даврига Андижон вилояти жиноят ишлари бўйича Мархамат туман судининг судьяси лавозимига қайта тайинланди ва шу муносабат билан Андижон вилояти жиноят ишлари бўйича Андижон шаҳар судининг судьяси лавозимидан озод қилинди. Зиядуллаев Шавкат Шарифович – судьялик ваколати муддати даврига Бухоро вилоят судининг фуқаролик ишлари бўйича судьяси лавозимига қайта тайинланди ва шу муносабат билан Бухоро вилояти фуқаролик ишлари бўйича Когон туманлараро судининг раиси лавозимидан озод қилинди. Холиков Умиджон Абдумажитович – судьялик ваколати муддати даврига Андижон вилоят судининг иқтисодий ишлар бўйича судьяси лавозимига қайта тайинланди ва шу муносабат билан Андижон вилояти Бўстон туманлараро иқтисодий судининг судьяси лавозимидан озод қилинди. Ахмедов Шухратжон Камилович – судьялик ваколати муддати даврига Фарғона вилоят судининг жиноят ишлари бўйича судьяси лавозимига қайта тайинланди ва шу муносабат билан Наманган вилоят судининг жиноят ишлари бўйича судьяси лавозимидан озод қилинди. Шунингдек: Инамов Авазбек Анварович – судьялик лавозимида бўлишнинг навбатдаги ўн йиллик, шундан беш йил муддатга Наманган вилояти жиноят ишлари бўйича Чуст туман судининг раиси лавозимига; Тогоев Шерали Рамазонович – судьялик лавозимида бўлишнинг навбатдаги ўн йиллик муддатига Навоий вилояти фуқаролик ишлари бўйича Кармана туманлараро судининг судьяси лавозимига; Раджабов Миразиз Анварович – судьялик лавозимида бўлишнинг навбатдаги ўн йиллик, шундан беш йил муддатга Бухоро вилояти фуқаролик ишлари бўйича Когон туманлараро судининг раиси лавозимига; Болтаев Суннатжон Музаффарович – судьялик лавозимида бўлишнинг навбатдаги ўн йиллик муддатига Навоий вилояти жиноят ишлари бўйича Навоий шаҳар судининг судьяси лавозимига; Қличев Ориф Аллаёрович – судьялик лавозимида бўлишнинг навбатдаги ўн йиллик муддатига Тошкент шаҳар судининг жиноят ишлари бўйича судьяси лавозимига тайинланди. Судьялар олий кенгаши матбуот хизмати
Ишонч телефони
Сизда ариза, шикоят ёки таклифлар мавжудми? Судьялар олий кенгашига ишонч телефонлари орқали мурожаат қилинг!
71 200-26-00 ёки 1190