Янгиликлар
Суд мажлиси ўтказилмаган, бошқа кунга қолдирилган...
“Telegram” мессенжеридаги “Yuristkadr” каналида ушбу кичкинагина хабарга тезроқ изоҳ берилмаса, баҳс-мунозара, билиб-билмай айтилаётган нордон гаплар ҳали-бери тўхтамайдигандек... Канал маъмурига кўра, фуқаролик ишлари бўйича Андижон туманлараро судида кеча соат 12.00.га белгиланган (Ф. Комиловнинг ишга тиклашга оид) “иш” гўёки адовактсиз кўрилган. Ваҳоланки, адвокат суд процессида масофадан туриб иштирок этишга тайёр бўлган, бироқ номаълум сабабларга кўра тизимга улана олмаган. Шундан келиб чиқиб, муаллиф таъна қилмоқдаки: “ҳар бир фуқаронинг судларда адвокат орқали ҳимояланиш ҳуқуқи бор. Кейин адвокат ҳам одам”! Муаллиф “адвокат ҳам одам”, дея унинг инсон экани борасида туғилган қандайдир шубҳага изоҳ бераётгани йўқ, албатта, бу билан суд процессида ҳимоячи ўзига хос ўринга эга эканини таъкидламоқда, холос. Йўқса, “ҳар бир фуқаронинг судларда адвокат орқали ҳимояланиш ҳуқуқи бор”лигини урғуламасди. Фақат масофадан туриб, боғлана олмагани сабаби ва воқеаларнинг кейинги ривожидан бехабар кўринади. Нега десангиз, муаллиф таъкид этган суд мажлиси белгиланган вақт-соатда мазкур судда масофадан туриб ўтказилаётган бошқа суд мажлиси давом этаётганди. (На чора, суд вақтини аввалдан белгилаш мумкин бўлса-да, суд мажлиси қанча вақт давом этишини олдиндан аниқ ҳисоб-китоб қилиш қийин.) Шу омил пойтахтдаги адвокатни (соат 12.00.га белгиланган) Андижондаги суд процессига видеоконференция тизими орқали улаш имкониятини бермаган. Сабаб шу. Бу баҳона эмас, ҳақиқат. Ҳақиқатлиги шуки, суд мажлиси “адвокат иштирокисиз” ўтмаган, балки, бошқа кунга - 13 октябрь соат 12.00.га қолдирилган. Суд мажлисининг қолдирилиши фуқаролик ишлари бўйича Андижон туманлараро судининг судьяси С. Жўрабоев чекига тушган мазкур низо қонуний муддатида кўриб чиқилишига таъсир қилмайди. Судьялар олий кенгаши матбуот хизмати
Кенгашдан сўнг: учта туманлараро суд раислари ўз жойида қолди ва бошқа тайинловлар
Судьялар олий кенгашининг навбатдаги йиғилиши бўлиб ўтаётгани хабари берилганди. Муҳокама якунларига кўра, бир нафар судья ваколати муддати даврига қайта тайинланди. Шунингдек, беш нафар судья ушбу лавозимда бўлишнинг навбатдаги ўн йиллик муддатига тайинланди. Уларнинг уч нафари туманлараро суд раислари бўлиб, фаолиятини ўз жойида давом эттирадиган бўлди. Судьялар олий кенгаши қарори билан: Исмаилов Нозимжон Рустамович – судьялик ваколати муддати даврига Наманган вилояти фуқаролик ишлари бўйича Чуст туманлараро судининг судьяси лавозимига қайта тайинланди ва шу муносабат билан Тошкент вилояти фуқаролик ишлари бўйича Чирчиқ туманлараро судининг судьяси лавозимидан озод қилинди. Шунингдек: Жураев Нозимжон Сатторович – судьялик лавозимида бўлишнинг навбатдаги ўн йиллик муддатига Бухоро вилоят судининг жиноят ишлари бўйича судьяси лавозимига; Бозорова Шоҳида Ориповна – судьялик лавозимида бўлишнинг навбатдаги ўн йиллик, шундан беш йил муддатга Бухоро вилояти фуқаролик ишлари бўйича Ромитан туманлараро судининг раиси лавозимига; Ғофуров Шерзод Шавкатович – судьялик лавозимида бўлишнинг навбатдаги ўн йиллик, шундан беш йил муддатга Навоий вилояти Зарафшон туманлараро иқтисодий судининг раиси лавозимига; Аскаров Равшанбек Гафурович – судьялик лавозимида бўлишнинг навбатдаги ўн йиллик, шундан беш йил муддатга Андижон вилояти Избоскан туманлараро иқтисодий судининг раиси лавозимига; Каюмов Мухаммад Вохидович – судьялик лавозимида бўлишнинг навбатдаги ўн йиллик муддатига Тошкент шаҳар жиноят ишлари бўйича Мирзо Улуғбек туман судининг судьяси лавозимига тайинланди. Судьялар олий кенгаши матбуот хизмати
Кўнгилларга чўғ солган инсон
Ҳар кимга ҳам устозлик насиб этмагай, Устозмас ул гар шогирд ҳолин билмагай! Хотира ёзиш оғир. Айниқса, ҳали тупроғи совумаган, ҳаёт йўлингда беқиёс ўрин тутган устозинг ҳақида қоғоз қораламоқ икки карра оғир бўларкан. Устоз Миршариф ака Мелиев етмиш икки ёшида хасталик сабаб омонатини топширди. У кишининг “кўпга қўшилиб кетган”ига ишонгинг келмайди, кўришганда ўзига хос сўрашиши-ю меҳр уфуриб турадиган сўзлари қулоғинг остида жаранглаётгандек бўлаверади... Айни пайтда Миршариф акани таниган ва билган дўсту-биродарлари, шогирдлари ҳам шундай ҳис-туйғуларни кечираётган бўлса, ажабмас. Чунки, муносабати барчага бирдай, оқибати ҳам бўлакча эди-да раҳматлининг. Узоқ йиллар бирга ишлаш мобайнида Миршариф аканинг бирон нимадан қаттиқ асабийлашгани ёки бирон кимга қаттиқ гапирганининг гувоҳи бўлмаганман ёки эшитмаганман. Ҳатто суд мажлисида тартибга риоя қилмайдиган судланувчиларга “Тартибга қаранг, жим!”, деганининг ўзи етарли бўларди. Миршариф ака 1980-2011 йиллар мобайнида Сирдарё вилоятининг Янгиер, Гулистон, Меҳнатобод, Сирдарё ва Мирзаобод туман судларида узлуксиз 31 йил судья, суд раиси бўлиб ишлади. Бу даврда, минг-минглаб жиноят, фуқаролик ва маъмурий ҳуқуқбузарлик ишларини кўриб ҳал қилди. Муболаға эмас, атай изласангиз ҳам Сирдарёдан у кишидан норизо одамни топа олмайсиз. Ҳатто “иши”ни кўрган айрим одамларнинг “Миршариф ака мени суд қилган, зўр одам эди”, деганига гувоҳ бўлганлар сероб... Устоз идора йиғишларида ёш судья ёки суд ходимларига айтадиган катта танбеҳи шу эди: “Қара” ( “кўзингни каттароқ оч, ҳушёр ва масъулиятли бўл”, деган маънода)! “Яхшилаб қара”, “Ўзинг биласан, қара-да” - бу ибораларни ишни кўриб чиқиш муддати ўтиб кетиши эҳтимоли ошаётган пайтда судьяга ёки суд мажлиси баённомасини ўз вақтида ёзмаган ёхуд ишга кечиккан ёинки суд қарорлари ижросида сусткашликка йўл қўяётган суд ижрочисига (у пайтлар суд ижрочилари бевосита суд тизимида эди) нисбатан ишлатарди. Дўқ уриб, ё овозини кўтариб эмас, шундай оҳангда айтардики, бошқача таъсир қилар, ходим ҳам дарҳол камчилигини тузатар эди. Миршариф ака ўта масъулиятли инсон эди. Ишни суд мажлисида кўриб чиқишдан аввал нафақат ишни, балки у билан боғлиқ қонунларни ҳам қайта ўрганиб, лозим жойларини қоғозга тушириб, астойдил тайёргарлик кўрар эди. Бир ишни кўришга киришдими,охирига етказиб, судланувчининг ҳаракатига тегишли ҳуқуқий баҳо бермаганча тинчимас эди. Шунинг учун ҳам у кишининг чекига тушган ишларнинг кўриб чиқиш муддати бузилмаган, чиқарган суд қарорлари барқарорлиги жуда юқори эди. Устоз ҳукмларни эринмай тўлиқ қўлда ёзиб чиқиб, суд залида шошилмасдан ўқиб эшиттирарди. Сўнг ҳукм мазмунини тарафларга эринмай тушунтирар, судланувчига қилган ҳаракатидан хулоса қилиши лозимлиги ҳақида насиҳат қилар эди. Жабрланувчи ва судланувчининг ота-онасига таскин берарди. Фақат шундай кейингина ҳукмдан норозилар бўлса, шикоят бериши мумкинлигини ва албатта иш юқори судда кўриб чиқилишини айтиб, суд мажлисини тугатар эди. Миршариф ака билганларини бошқаларга ўргатишдан эринмасди. Аксинча, бундан роҳат оларди. Айниқса, судланувчининг ҳаракатини малакалаш бўйича жумбоқли ҳолатга ҳуқуқий ечим топишда ёш судьяларга беминнат тавсиялар берар, қонуннинг айнан қайси моддаси ёки бандини қўллаш лозимлигини эринмай ўргатар эди. Қонунларни шарҳлашни яхши кўрар ва доим бунинг уддасидан чиқар эди. Ўзи билан бирга ишлаган нафақат судья, балки суд ходимларининг шахсий ҳаёти, оилавий аҳволидан мудом хабардор, яхши-ёмон кунида камарбаста инсон эди. Ҳамкасб ёки шогирдлари юртимизнинг қайси нуқтасида яшамасин, вақт топиб, синовли кунларида ҳамдард, қувончли кунларига шерик бўларди. Миршариф ака ана шундай барчага бирдай меҳр-оқибатли, шунинг учун ҳам кўпларнинг эътирофи ва эътиборига сазовор бўлган, суд фахрийси, Меҳнат фахрийси ва яна кўплаб кўкрак нишонлари соҳиби эди. Одамнинг олган унвон-у нишонлари эмас, одамдан қолгани ҳисоб деганларидек, Миршариф акадан қобил фарзанд-у набиралар, кўп сонли шогирдлар қолди. Миршариф акани таниган инсонлар қалбида у кишининг одамгарчилиги-ю оқибатидан бир чўғ қолди. Бу чўғ одамлар қалбида узоқ яшайди, у кишининг ишларини энди фарзанду шогирдлари давом эттиради. Устоз Миршариф Мелиевнинг охиратлари обод бўлсин! Кўп сонли шогирдлари номидан Холмўмин Ёдгоров, Судьялар олий кенгаши раиси
Ишонч телефони
Сизда ариза, шикоят ёки таклифлар мавжудми? Судьялар олий кенгашига ишонч телефонлари орқали мурожаат қилинг!
71 200-26-00 ёки 1190