Янгиликлар
Ибратли бўлмоқ машаққати ва масъулияти
Бугун Судьялар олий кенгашида фаолиятида алоҳида ўрнак ва намуна кўрсатиб келаётган судьяларга “Ибратли судья” мукофотини топширишга бағишланган тантанали тадбир бўлиб ўтди. Бундай эътирофга сазовор бўлганлар орасида Олий суд судьясидан то туман суди судьяларигача бор. Судьялар олий кенгаши фаолиятида очиқлик ва шаффофлик каби тамойиллар тобора ўз аксини кўрсатиб бораётгани кенг жамоатчилик томонидан ҳақли равишда эътироф этиб келмоқда. Судьялик лавозимларига очиқ танлов ва муқобиллик асосида танлаш ва тайинлаш, бу жараёнда оммавий ахборот воситалари билан фаол ва конструктив ҳамкорлик, тизим фаолиятига оид танқидий чиқишларга тезкор ва холис муносабат билдирилаётганини алоҳида қайд этмоқ даркор. “Ибратли судья” мукофотига муносибларни танлашда ҳам айни мезонлар устувор аҳамият касб этганини кўриш мумкин. Маълумки, Давлат раҳбарининг 2020 йил 7 декабрдаги «Судьяларнинг чинакам мустақиллигини таъминлаш ҳамда суд тизимида коррупциянинг олдини олиш самарадорлигини ошириш чора-тадбирлари тўғрисида»ги Фармони билан соҳада очиқлик ва шаффофликни таъминлашга қаратилган қатор ўзгаришлар жорий этилиб, жумладан, одил судловни амалга оширишда юқори рейтинг кўрсаткичга эга бўлган судьяларни «Ибратли судья» мукофоти билан тақдирлаш белгиланган эди. Мазкур фармон ижроси доирасида судьялар фаолияти самарадорлигини очиқ ва шаффоф баҳолаш бўйича миллий электрон рейтинг баҳолаш дастури ишга туширилди. Ушбу тизим жорий этилиши инсон омилини кескин чеклаш баробарида судьялар фаолиятини очиқ, шаффоф ва энг муҳими - холис баҳолаш имкониятини яратди. 2022 йилдан бошлаб, энг юқори рейтинг кўрсатгичларига эга судьялар давлатимиз раҳбарининг юқорида қайд этилган фармони асосида таъсис этилган “Ибратли судья” мукофоти билан тақдирлаб келинмоқда. 2021 йил якунига кўра, юқори рейтинг кўрсаткичлари, шунингдек билими ҳамда маънавий фазилатлари билан намуна бўлган 16 нафар судья илк бор мазкур мукофотга лойиқ, деб топилган бўлса, 2022 йил куни бўйича 20 нафар судья шундай эътирофга сазовор бўлди. Тадбирда алоҳида қайд этилдики, ўтган йили 646 нафар судья томонидан қабул қилинган ҳужжатлар бекор қилинмаган, бу уларнинг фаолияти қониқарли демоққа тўла асос беради. Мукофотга лойиқ кўрилганлар эса уларнинг орасидан танлаб олинганидир. Муносибларни танлашда эса суд қарорлари сифатидан ташқари судьяларнинг маънавий фазилатлари, ташаббускорлиги ва, айниқса, “Судьялар одоби кодекси” талабларига риоя этилгани каби мезонлардан келиб чиқилди. Мукофот соҳибларининг 7 нафари биринчи инстанцияда фаолият кўрсатган, 8 нафари эса ушбу лавозимга тайинланганига ҳали беш йил тўлмаган судьялар экани эса тизимдаги ёш кадрлар ўзларига билдирилган ишончни оқлаётганини кўрсатади. Бугун мукофотлар ўз эгаларига тантанали равишда топширилди. Фаолият кўрсатгичи пастроқ судьяларнинг малакасини ошириш мақсадида коплекс-чоралар кўрилаётир. Бу жараёнда улар тажрибали судьяларга бириктирилиб, “Устоз-шогирд” тамойили устуворлигига алоҳида эътибор қаратилмоқда. Судьялар олий кенгаши матбуот хизмати
Тахмин-тусмоллар эмас, аниқ далиллар керак!
Фарғоналик блогер Ш.Эсанов ижтимоий тармоқ орқали Судьялар олий кенгашига мурожаат қилиб, ўзига нисбатан юритилган маъмурий ҳуқуқбузарликка оид ишни мазмунан кўриб чиққан жиноят ишлари бўйича Фарғона шаҳар судининг судьяси Ж. Хўжамбердиевнинг хатти-ҳаракатларидан норозилигини билдиради. Мурожаатда баён этилган ҳолатлар ўрганилганда суд мажлиси жараёнида судья томонидан “Судьялар одоби кодекси” талаблари бузилгани аниқланмади. Шунингдек, суд мажлиси ўз вақтида бошланмагани судга эмас, иш бўйича тарафлардан бирининг белгиланган вақтда ҳозир бўлмаганига боғлиқ экани ҳам ойдинлашди. Мурожаатчининг суд мажлисида тингловчи бўлиб ўтирган икки нафар шахс унинг шаъни ва қадр-қимматини камситгани, бунга гўёки судья шароит яратиб берганлиги тўғрисидаги важларига ҳам қўшилиш қийин. Агар у ўз шаъни ва қадр-қиммати бошқалар томонидан камситилган деб ҳисобланса, бу ҳақда тегишли органга тўғридан-тўғри мурожаат қилишига ҳеч қандай монелик йўқ. Судьянинг суд мажлисига тарафларни келтириш билан боғлиқ хатти-ҳаракатлари маъмурий ҳуқуқбузарликка оид ишни ўз муддатида кўриб чиқишга қаратилган чора бўлиб, бу ҳол процесс иштирокчиларининг қонуний ҳуқуқ ва манфаатлари бузилишига олиб келмаган. Мурожаатдаги бошқа ҳолатлар муаллифнинг тахмин-тусмоллари бўлиб, улар инкор этиб бўлмас факт ва асосга эга эмас. Cуд мажлисининг ўзига келсак. Унда блогер Ш. Эсановнинг Маъмурий ҳуқуқбузарлик тўғрисидаги кодексининг 40-моддасида (“туҳмат”) назарда тутилган ҳуқуқбузарликни содир этганликда айбли деб топилиши натижасида жарима жазоси тайинланган. Сўзимиз якунида суд қароридан норози тараф тегишли тартибда шикоят қилиши ҳуқуқига эгалигини эслатиш ортиқчалик қилмас. Судьялар олий кенгаши матбуот хизмати
Танлов якунланди: кутилган ва кутилмаган ғолиблар
Судьялар олий кенгаши томонидан суд органлари ва оммавий ахборот воситалари ходимлари ўртасида эълон қилинган танлов ғолиблари эълон қилинди. Бугун шу муносабат билан талов ғолибларини тақдирлаш маросими бўлиб ўтди. Улар орасида кутилган муаллифлардан кутилмаганлари кўпроқ бўлганини ғолибларининг ўзлари эътироф этди. Таъкид этилдки, бугун ижтимоий ҳаётда очиқлик ва шаффофлик тамойиллари устувор ҳисобланади. Мазкур тамойиллар суд тизимида ҳам тобора ўз аксини топиб бормоқда. Судьялар олий кенгаши томонида ўтказилаётган турли тадбирлардан ташқари судьялик лавозимига тайинловларгача бўлган жараёнларда оммавий ахборот воситалари ходимлари ва блогерлар фаол иштирок этмоқда. Зотан, жамиятда очиқлик ва шаффофлик оммавий ахборот воситалари орқали самарали таъминланади. Очиқлик ва шаффофлик устувор аҳамият касб этар экан, бу ўз-ўзидан давлат органи ва ташкилотларини оммавий ахборот воситалари ходимлари ва блогерлар билан изчил конструктив мулоқотда бўлишини талаб этади. Бу борадаги ишлар самарадорлигини янада ошириш мақсадида жорий йилнинг октябрь ойида Судьялар олий кенгаши ташаббуси билан журналист ва блогерлар учун икки ҳафталик бепул ўқув-семинари ташкил этилиб, унда фаол иштирок этган 81 нафар журналист ва блогерларга сертификат ва махсус ҳуқуқий қўлланма берилди. Судьялар олий кенгаши томонидан эълон қилинган танлов бу борадаги ишларнинг давоми ҳисобланди. Суд органлари ва оммавий ахборот воситалари ходимлари ҳамда блогерлар билан конструктив ҳамкорликни янги босқичга кўтариш ва ҳуқуқий тарғибот ишлари самарадорлигини ошириш мақсадида ўтказилган танловда эллик нафар яқин муаллифларнинг 300 дан зиёд ишлари кўриб чиқилди. Ижодий ишлар мавзу долзарблиги, танқидларнинг холис ва асослиги ҳамда муаллифнинг касбий маҳоратдан келиб чиқиб баҳоланди.Эътиборлиси, танловда ғолибларининг аксарияти ўзларининг танқидий-таҳлилий чиқишлари билан тилга тушган журналист ва блогерлар бўлди. Тадбирда ғолибларга махсус соврин ва дипломлар топширилди. Судьялар олий кенгаши матбуот хизмати
Ишонч телефони
Сизда ариза, шикоят ёки таклифлар мавжудми? Судьялар олий кенгашига ишонч телефонлари орқали мурожаат қилинг!
71 200-26-00 ёки 1190