Янгиликлар
РАСМИЙ МУНОСАБАТ
Бугун Telegram ижтимоий тармоғидаги “Generalissimus” блогида Ўзбекистон Республикаси Президенти Администрацияси раҳбари номига аёл судьялардан бири мурожаат йўллаганлиги, унда Судьялар олий кенгаши қарорига асосан аёл судьянинг доимий яшаш жойидан узоқ ҳудудда фаолият юритаётганлиги, бу эса унинг оилавий шароити ва хавфсизлигига салбий таъсир кўрсатаётганлиги ҳақида аноним фикр билдирилган. Ушбу маълумотлар ҳақиқатга тўғри келмайди, чунки миллий қонунчилигимизга кўра, фуқарони унинг хоҳиш-истагига қарши ёки шахсий розилигисиз судьялик лавозимига тайинлашнинг ҳуқуқий жиҳатдан имкон мавжуд эмас. “Судлар тўғрисида”ги ҳамда “Ўзбекистон Республикаси Судьялар олий кенгаши тўғрисида”ги қонунлар талабларига мувофиқ судьялик лавозимларига тайинлаш ва бошқа судга ўтказиш вакант судьялик лавозимлари учун эълон қилинган танлов натижаларига ҳамда номзоднинг шахсан берган аризаси асосида амалга оширилади. Яъни, судьялик лавозимига тайинлаш ёки бошқа судга ўтказиш судья (номзод)нинг ўз хоҳиш-иродасини ифода этувчи аризаси мавжуд бўлган тақдирдагина амалга оширилади. Вакант лавозимлар очиқ эълон қилинади ва номзодлар муайян вакант (бўш) лавозимни эгаллаш учун ўтказиладиган танловда фақатгина ўзининг ёзма аризасига асосан иштирок этади. Номзодлар республиканинг у ёки бу ҳудудларида бўш иш ўринлари борлиги ҳақида олдиндан хабардор қилинади ва ушбу суднинг яшаш жойидан қанчалик узоқлигини англаган ҳолда, муайян жой учун ҳужжат топшириш қарорини мустақил қабул қиладилар. Бундан ташқари, амалдаги қонунчиликка мувофиқ, доимий яшаш жойидан ташқари ҳудудда фаолият юритаётган ва турар жойга эга бўлмаган судьяларга турар жойни ижарага олиш билан боғлиқ харажатлар белгиланган тартибда давлат томонидан қоплаб берилади. Иқтисодий ва маъмурий туманлараро судлари вилоят марказида жойлашган. Фуқаролик ишлари бўйича туманлараро судлари 2-4 туман аҳолисига хизмат қилади. Шунга кўра, жиноят ишлари бўйича судлардан ташқари суд судьяларини бевосита ўзи яшаб турган ҳудудга (туман, шаҳарга) тайинлаш имконияти кўп ҳолатларда мавжуд эмас. Шунингдек, амалдаги қонунчиликка мувофиқ, судьялар ўз ташаббуси билан бошқа судга, жумладан доимий яшаш жойига яқин ҳудуддаги вакант лавозимга ўтказишни сўраб Судьялар олий кенгашига мурожаат қилиш ҳуқуқига эга. Амалиётда судьяларни бошқа судларга ўтказиш масалалари фақат уларнинг хоҳишига кўра эмас, балки суд ҳокимияти манфаатлари, судларда кадрлар мувозанатини таъминлаш, манфаатлар тўқнашувининг олдини олиш ҳамда судьянинг мустақиллиги ва холислигини таъминлаш заруратидан келиб чиққан ҳолда ҳал этилади. Хусусан, айрим ҳолатларда судьянинг яқин қариндошлари ёки қуда-андачилик муносабатлари туфайли бир ҳудудда бир хил ихтисосликда фаолият юритиши манфаатлар тўқнашуви хавфини келтириб чиқариши мумкин. Бундай ҳолатларда судьялар имкон қадар яшаш жойига энг яқин бўлган бошқа ҳудуддаги судга ўтказилади. Шунингдек, айрим ҳолларда судьянинг муайян ҳудудда фаолият юритиши суд мустақиллигига ёки одил судловни амалга оширишга салбий таъсир кўрсатиши мумкин бўлган вазиятлар юзага келганда, уни бошқа ҳудудга ўтказиш зарурати пайдо бўлади. Бундай қарорлар судьянинг мустақиллиги ва суд ҳокимиятининг обрўсини таъминлаш мақсадида қабул қилинади. Амалдаги қонунчиликда судьяларни ротация қилиш ва бошқа ишга ўтказишнинг аниқ механизмлари кўзда тутилган. Оилавий шароит ўзгарганда ёки бошқа объектив сабаблар юзага келганда, судья тегишли бўш иш ўрни мавжуд бўлган тақдирда, ўша тоифадаги бошқа судга ўтказишни сўраб Судьялар олий кенгашига тўғридан-тўғри ёки малака ҳайъати орқали ариза билан мурожаат қилиш ҳуқуқига эга. Қолаверса, бошқа судьялик лавозимларига ўтказиш очиқ танловлар асосида ўтказилиб, бунда эълон қилинган бўш судьялик лавозимига ариза берган судьялар орасидан билими, касбий лаёқати, шахсий фазилатлари, одоби, ҳудуддаги кўриладиган ишлар юкламаси, низолар хусусияти, мураккаблиги эътиборга олинган ҳолда, танлов натижаларига кўра эълон қилинган муайян судьялик лавозимига энг муносиб номзод Кенгашнинг коллегиал қарори асосида тайинланади. Номи сир тутилаётган ушбу аёл судья қўшни вилоятда бўш судьялик лавозими учун конкурсда иштирок этиш учун ўз ихтиёри билан ариза топширган. Кенгаш йиғилишида эса ўғли билан кўчиб бориб ишлаш олишини, масофа ҳеч қандай муаммо туғдирмаслигини шахсан таъкидлаган. Ўрганишлар давомида аниқланишича, кейинги олти ой мобайнида доимий яшаш жойига яқин ҳудуддаги судга ўтказиш масаласи юзасидан аёл судьялар томонидан Судьялар олий кенгашига бирорта ҳам ариза келиб тушмаган. Судьялар олий кенгаши судьяларнинг меҳнат фаолияти, ижтимоий кафолатлари ҳамда қонуний манфаатларини таъминлашга оид мурожаатлар келиб тушган тақдирда, уларни қонунчиликда белгиланган тартибда ҳар томонлама ва холис кўриб чиқиш чораларини кўради. Шуни ҳам қайд этиш лозим, ҳар бир аёл судья Кенгашнинг доимий эътиборида ва уларни қўллаб-қувватлаб келади. Номи сир тутилаётган судья амалдаги тартибга риоя қилган ҳолда ўзи яшаш жойига яқин бўлган вакант жойга ўтказиш борасида мурожаат қилишига бирон моънелик йўқ. Судьялар олий кенгаши матбуот хизмати
Пресс-тур доирасидаги мулоқот: шаффофлик бош мезон
Бугун Судьялар олий кенгашининг ташаббуси билан 27 июнь — Матбуот ва оммавий ахборот воситалари ходимлари кунига бағишлаб, журналист ва блогерлар учун пресс-тур ташкил этилди.Пресс-турда Судьялар олий кенгаши раиси Х.Ёдгоров иштирокчиларни қутлаб, мамлакатимиз тараққиётининг янги босқичида амалга оширилаётган суд ислоҳотлари, соҳада очиқлик ва шаффофликни таъминлаш борасида фикрларини билдирди.Республикамизнинг барча ҳудудларидан келган 50 ортиқ оммавий ахборот воситалари вакиллари Судьялар олий кенгашида бўлиб, судьялик лавозимларига энг муносиб номзодларни танлаш ва тайинлаш жараёнига ахборот ва коммуникация технологияларини жорий этиш, судьяларнинг фаолиятини рейтинг асосида баҳолаб бориш борасидаги рақамлаштириш билан яқиндан танишишди.Cудьялар олий кенгашининг судьяси, Ташкилий-назорат ва ахборот-таҳлил шўъбаси раҳбари Хуршид Содиқов пресс-тур иштирокчиларига Кенгаш фаолиятининг очиқлигини, айниқса судьяларни лавозимга тайинлаш жараёнидаги шаффофликни таъминлашга қаратилган амалий ишлар бўйича батафсил маълумот берди.Шундан сўнг иштирокчилар Одил судлов академияси фаолияти билан яқиндан танишдилар. Хусусан, уларга суд имитацияси хонаси, судьяликка номзодларни психологик тайёрлаш жараёнлари ҳамда Ахборот-ресурс марказининг имкониятлари намойиш этилди.Тадбир якунида Судьялар олий кенгаши томонидан эълон қилинган ижодий танлов ғолиблари, фаол журналист ва блогерлар тақдирланди. Шунингдек, ОАВ билан ҳамкорликни янада ривожлантириш ҳамда суд-ҳуқуқ соҳасидаги ислоҳотларни кенг жамоатчиликка етказиш масалалари юзасидан фикр-мулоҳазалар алмашилди.Ижодий танлов ғолиблари қуйидаги номинациялар бўйича аниқланди: «Энг яхши репортаж» — Мўътабар Нурмуҳаммедова, «Севимли» телеканали «Замон» дастури мухбири;«Энг яхши телекўрсатув» — Гулайым Ганиева, Қорақалпоғистон Республикаси судининг жамоатчилик ва ОАВ билан алоқалар бўйича бош консультанти;«Энг яхши радиоэшиттириш» — Холбиби Сафарова, «Навоий» радиоканали муҳаррири;«Энг яхши интернет нашри материали» — Муҳаммадқодир Собиров;«Энг яхши блогер материали» — Нурилло Тўхтасинов, Тошкент давлат юридик университети катта ўқитувчиси ва мустақил журналист;«Энг яхши мақола материали» — Авазбек Худойқулов, «Янги Ўзбекистон» газетаси бўлим мудири.Айниқса, ижодий танловга иштирок этган ва «энг ёш иштирокчи» номинацияси бўйича ғолиб деб топилган Самарқанд вилояти Тойлоқ туманидаги 9-синф ўқувчиси Зулайҳо Хурсанмуродова иштирокчиларнинг диққатини тортди. Эндигина 15 ёшга тўлган Зулайҳо ўзи мустақил равишда мамлакатимизда инсон ҳуқуқларини таъминлаш бўйича амалга оширилаётган ислоҳотлар тўғрисида радиолавҳа тайёрлаб, танловга тақдим этган. Ушбу танловда иштирок этиш мен учун катта тажриба мактаби бўлди. Инсон ҳуқуқларини таъминлаш соҳасида мамлакатимизда амалга оширилаётган ислоҳотлар ҳақида радиолавҳа тайёрлаш жараёнида кўплаб янги билимларга эга бўлдим. «Энг ёш иштирокчи» номинацияси ғолиби деб топилганим мен учун катта шараф ва масъулиятдир. Менга билдирилган ишонч учун ташкилотчиларга миннатдорлик билдираман. Бу эътироф келгусида янада фаол ва ижодкор бўлишим учун катта рағбат бўлди, — дейди у.
Ижодий танловга 200 дан ортиқ медиа материаллар Тақдим этилди
Жорий йилнинг 16 июнь куни Янги Ўзбекистонда амалга оширилаётган суд-ҳуқуқ ислоҳотларининг мазмун-моҳиятини жамоатчиликка етказишда фаоллик кўрсатаётган, шунингдек Судьялар олий кенгаши ҳамда Одил судлов академияси фаолиятини тизимли равишда ёритиб келаётган оммавий ахборот воситалари вакиллари учун ижодий танлов эълон қилинган эди. Танловни ўтказиш бўйича ташкилий гуруҳнинг маълумотларига кўра, ижодий танлов журналист ва блогерлар ўртасида жуда катта қизиқиш уйғотиб, улар томонидан 6 кун ичида Республикамизнинг барча ҳудудларидан 209 та ижодий материаллар тақдим этилган. Улардан: 107 та телекўрсатув ва видеолавҳалар; 73 та радиоэшиттириш; 19 та интернет материаллари; 10 таси мақола ҳисобланади. Бу кўрсаткич суд-ҳуқуқ соҳасидаги ислоҳотларга оммавий ахборот воситаларининг эътибори қай даражада юқори эканлигидан далолат беради. Танловнинг якуний натижалари 2026 йил 25 июнь куни эълон қилинади ва танлов ғолиблари тақдирланади.
Ишонч телефони
Сизда ариза, шикоят ёки таклифлар мавжудми? Судьялар олий кенгашига ишонч телефонлари орқали мурожаат қилинг!
71 200-26-00 ёки 1190