Янгиликлар
Таъна, шаъма тушунарли, муддао нима?!
Бир-икки кундан буён серқирра (собиқ журналист, ҳаваскор вайнер, блогер, фаолият бошлаганига унча кўп бўлмаган адвокат) Б. Аҳмедов ижтимоий тармоқ орқали Наманган вилояти судининг иқтисодий ишлар бўйича судлов ҳайътида кўрилаётган суд иши мисолида судларда жорий этилган янги тартибларга эътироз билдириб келмоқда. Баҳслашиш бефойда, зеро, муаллиф “ҳазм қилолмаётган” тартиблар қонун билан жорий этилган, муаллиф фикрини ҳурмат қилган ҳолда айтиш мумкинки, қонунлар то кучда экан, ҳеч қандай “дийдиё”ни кўтармайди, унга риоя этиш шарт. Бугун яна мавзуга қайтган муаллиф судлов таркибига берган раддияси қаноатлантирилмаганини писанда билан таъкид этиб, Судьялар олий кенгашидан муносабат сўрабди (?!). Б. Аҳмедовнинг тажрибасизлиги шундан ҳам кўринадики, Кенгаш судьяларнинг процессуал ҳаракатига баҳо бермайди, унинг раддияси қаноатлантирилмагани айнан шундай (процессуал) ҳаракат ҳисобланади. Агар судлов ҳайъати судьялари “Судьялар одоби кодекси” қоидаларига зид ҳаракат қилган бўлса, бошқа гап: шикоятлар бўлса, тегишли тартибда кўриб чиқилади. Масаланинг бошқа томони ҳам томони бор. Б. Аҳмедов ижтимоий тармоқ орқали чиқишларида бот-бот Кенгаш матбуот котибини гоҳ пинҳона, гоҳ ошкора тилга олишни, неча йиллар аввалги мақолаларидан иқтибослар келтиришни канда қилмаётир: муддаоси нима – ўзига ҳавола. Коса тагида нимкоса қабилида “устозим” дейишининг ҳам ёмон жойи йўқдир балки?! Аммо унинг ўринсиз “лутфлари” турли асоссиз, хусусан, муаллиф устози Кенгашда ишлашини билвосита бежиз таъкидлаётгани йўқ, шундай усул билан “устоз-шогирд” суд ишига таъсир ўтказишга уринаётган кўринади, деган янглиш тасаввурлар ҳам пайдо қилмоқда. Муаллиф Кенгаш вакилига нисбатан шахсий муносабатини оммавий тарзда билдириши натижасида юзага келган вазият - унга айнан шундай (оммавий) изоҳ беришни тақозо қилмоқда, бунинг учун ўқувчилардан узримиз бор. Изоҳ эса қуйидагича: самимий ё носамимийлигидан қатъи назар, лутф (“устоз”?) учун ташаккур. Бироқ илгари на бўлғуси журналист, кейинроқ на бўлғуси адвокат сифатида муаллиф “устоз!” деб, пешимиздан тутмаган, ўз навбатида биз ҳам уни “шогирд!”, дея оғзига туфлаган жойимиз йўқ. Ушбу сўзлар масъулияти зиммамизда, имзо: Турсунали Акбаров, Судьялар олий кенгаши матбуот котиби
Тошкентда икки кунлик халқаро семинар ўз ишини бошлади
Судьялар олий кенгаши ва «Минтақавий мулоқот» (Словения) нодавлат халқаро ташкилотининг Ўзбекистондаги филиали ҳамкорлигида “Шахсга нисбатан эҳтиёт чора қўллаш асослари: хориж тажрибалари” мавзуида икки кунлик халқаро семинар бошланди. Унда АҚШ, Словения давлатлари суд тизими вакиллари, халқаро экспертлар, мамлакатимизда фаолият кўрсатаётган жиноят ишлари бўйича судлар судьялари, шунингдек, Судьялар олий кенгаши ҳузуридаги Судьялар олий мактабининг тингловчилари иштирок этмоқда. Мамлакатимизда барча соҳалари қатори суд тизимида кенг ислоҳотлар амалга ошириб келинмоқда. Бунинг натижасида судьялик лавозимларига номзодларни тайёрлаш, танлаш ва тайинлашдан тортиб, судлар ихтисослашуви, судларда ишлар кўрилиши тартибларигача такомиллаштирилди, қатор янгиликлар жорий этилди. Бунинг ижобий натижалар ҳам ҳақли равишда эътироф қилинмоқда. Маълумки, давлатимиз раҳбари томонидан 2023 йил 11 сентябрда қабул қилинган «Ўзбекистон — 2030» стратегияси тўғрисида»ги фармонида 2024 йил якунига қадар тезкор-қидирув ва тергов ҳаракатларига санкция бериш масаласини алоҳида судьялар, яъни тергов судьялари томонидан кўриб чиқиш тартиби жорий этилиш белгиланди. Мазкур тартиб инсон ҳуқуқлари ва эркинликларини янада самарали ҳимоя қилишига хизмат қилади. Албатта, ҳар қандай янгилик, янги тартиб, янги амалиётлар илғор хориж давлатлари тажрибасини ўрганишни тақазо қилади. Халқаро тадбирда шахсга нисбатан судгача эҳтиёт чоралари қўллаш бўйича АҚШ ва Словения давлатларининг тажрибалари билан яқиндан танишилмоқда. Жонли мулоқот шаклида ўтаётган тадбирда АҚШ ва Европа қонунчилигидаги судгача гумондорнинг эркинликларини чеклаш, унга нисбатан эҳтиёт чоралари қўллашга оид нормалар, мазкур жараённинг ўзига хос қирралари ва хусусиятлари бўйича фикр алмашилмоқда. Семинар эртага ўз ишини якунлайди. Судьялар олий кенгаши матбуот хизмати
Кенгашда янги тайинловлар бўйича тегишли қарорлар қабул қилинди
Хабар қилинганидек, бугун Судьялар олий кенгашининг судьялик лавозимларига танлаш ва тайинлашга доир очиқ танлов шаклидаги навбатдаги йиғилиши бўлиб ўтди. Унда ваколат муддати якунига етган судьяларни ушбу лавозимда бўлишнинг навбатдаги муддатига, айрим судьяларни муқобиллик асосида ваколати муддати даврига қайта тайинлашга оид масалалар муҳокама қилиниб, тегишли қарорлар қабул қилинди. Судьялар олий кенгаши қарори билан: Юлдашев Илҳом Бобожонович – судьялик ваколати муддати даврига Бухоро вилояти Бухоро туманлараро иқтисодий судининг раиси лавозимига қайта тайинланди ва шу муносабат билан Бухоро вилоят судининг иқтисодий ишлар бўйича судьяси лавозимидан озод қилинди; Мамарасулов Ҳасан Болтабоевич – судьялик ваколати муддати даврининг беш йил муддатига Жиззах вилояти Фориш туман иқтисодий судининг раиси лавозимига қайта тайинланди ва шу муносабат билан Сирдарё вилоят судининг иқтисодий ишлар бўйича судьяси лавозимидан озод қилинди; Кушиев Ғуломжон Ёқубжонович – судьялик ваколати муддати даврининг беш йил муддатига Хоразм вилояти Урганч туманлараро маъмурий судининг раиси лавозимига қайта тайинланди ва шу муносабат билан Навоий вилоят маъмурий судининг судьяси лавозимидан озод қилинди; Буриев Азиз Абдукаимович – судьялик ваколати муддати даврига Тошкент шаҳар фуқаролик ишлари бўйича Яккасарой туманлараро судининг судьяси лавозимига қайта тайинланди ва шу муносабат билан Тошкент вилояти фуқаролик ишлари бўйича Чирчиқ туманлараро судининг судьяси лавозимидан озод қилинди. Хакимов Музафар Абдуллаевич – судьялик ваколати муддати даврига Самарқанд вилояти жиноят ишлари бўйича Пайариқ туман судининг судьяси лавозимига тайинланди. Шунингдек, ваколат муддати якунига етган: Соатов Дилшод Туйчиевич – судьялик лавозимида бўлишнинг навбатдаги ўн йиллик муддатига Наманган вилояти Чуст туманлараро иқтисодий судининг судьяси лавозимига; Очилов Дилмурод Мадаминович – судьялик лавозимида бўлишнинг навбатдаги ўн йиллик муддатига Навоий вилоят маъмурий судининг судьяси лавозимига; Матниязов Сардорбек Хожиназарович – судьялик лавозимида бўлишнинг навбатдаги ўн йиллик муддатига Тошкент шаҳар маъмурий судининг судьяси лавозимига; Хожиев Абдусаид Худайбердиевич – судьялик лавозимида бўлишнинг навбатдаги ўн йиллик муддатига Тошкент шаҳар маъмурий судининг судьяси лавозимига; Кудратов Аброр Хамидуллаевич – судьялик лавозимида бўлишнинг навбатдаги ўн йиллик муддатига Сирдарё вилояти Гулистон туманлараро маъмурий судининг судьяси лавозимига; Муминова Феруза Исмаиловна – судьялик лавозимида бўлишнинг навбатдаги ўн йиллик муддатига Тошкент вилояти фуқаролик ишлари бўйича Оҳангарон туманлараро судининг судьяси лавозимига; Махаммадиева Латофат Асқаровна – судьялик лавозимида бўлишнинг навбатдаги ўн йиллик муддатига Қашқадарё вилояти фуқаролик ишлари бўйича Қарши туманлараро судининг судьяси лавозимига; Набиев Мажид Садуллоевич – судьялик лавозимида бўлишнинг навбатдаги ўн йиллик, шундан беш йил муддатга Тошкент вилояти Бекобод туманлараро иқтисодий судининг раиси лавозимига; Жаббаров Толмас Рузимуродович – судьялик лавозимида бўлишнинг навбатдаги ўн йиллик муддатига Сурхондарё вилояти Шеробод туманлараро иқтисодий судининг судьяси лавозимига тайинланди. Бундан ташқари: Хашимов Рустам Фуркатович – судьялик лавозимида бўлишнинг беш йиллик муддатига Тошкент вилояти фуқаролик ишлари бўйича Чирчиқ туманлараро судининг судьяси лавозимига; Султанов Болат Рахманович – судьялик лавозимида бўлишнинг беш йиллик муддатига Тошкент вилояти жиноят ишлари бўйича Зангиота туман судининг судьяси лавозимига тайинланди. Судьялар олий кенгаши матбуот хизмати
Ишонч телефони
Сизда ариза, шикоят ёки таклифлар мавжудми? Судьялар олий кенгашига ишонч телефонлари орқали мурожаат қилинг!
71 200-26-00 ёки 1190