Янгиликлар
Тошкентда икки кунлик халқаро семинар ўз ишини бошлади
Судьялар олий кенгаши ва «Минтақавий мулоқот» (Словения) нодавлат халқаро ташкилотининг Ўзбекистондаги филиали ҳамкорлигида “Шахсга нисбатан эҳтиёт чора қўллаш асослари: хориж тажрибалари” мавзуида икки кунлик халқаро семинар бошланди. Унда АҚШ, Словения давлатлари суд тизими вакиллари, халқаро экспертлар, мамлакатимизда фаолият кўрсатаётган жиноят ишлари бўйича судлар судьялари, шунингдек, Судьялар олий кенгаши ҳузуридаги Судьялар олий мактабининг тингловчилари иштирок этмоқда. Мамлакатимизда барча соҳалари қатори суд тизимида кенг ислоҳотлар амалга ошириб келинмоқда. Бунинг натижасида судьялик лавозимларига номзодларни тайёрлаш, танлаш ва тайинлашдан тортиб, судлар ихтисослашуви, судларда ишлар кўрилиши тартибларигача такомиллаштирилди, қатор янгиликлар жорий этилди. Бунинг ижобий натижалар ҳам ҳақли равишда эътироф қилинмоқда. Маълумки, давлатимиз раҳбари томонидан 2023 йил 11 сентябрда қабул қилинган «Ўзбекистон — 2030» стратегияси тўғрисида»ги фармонида 2024 йил якунига қадар тезкор-қидирув ва тергов ҳаракатларига санкция бериш масаласини алоҳида судьялар, яъни тергов судьялари томонидан кўриб чиқиш тартиби жорий этилиш белгиланди. Мазкур тартиб инсон ҳуқуқлари ва эркинликларини янада самарали ҳимоя қилишига хизмат қилади. Албатта, ҳар қандай янгилик, янги тартиб, янги амалиётлар илғор хориж давлатлари тажрибасини ўрганишни тақазо қилади. Халқаро тадбирда шахсга нисбатан судгача эҳтиёт чоралари қўллаш бўйича АҚШ ва Словения давлатларининг тажрибалари билан яқиндан танишилмоқда. Жонли мулоқот шаклида ўтаётган тадбирда АҚШ ва Европа қонунчилигидаги судгача гумондорнинг эркинликларини чеклаш, унга нисбатан эҳтиёт чоралари қўллашга оид нормалар, мазкур жараённинг ўзига хос қирралари ва хусусиятлари бўйича фикр алмашилмоқда. Семинар эртага ўз ишини якунлайди. Судьялар олий кенгаши матбуот хизмати
Кенгашда янги тайинловлар бўйича тегишли қарорлар қабул қилинди
Хабар қилинганидек, бугун Судьялар олий кенгашининг судьялик лавозимларига танлаш ва тайинлашга доир очиқ танлов шаклидаги навбатдаги йиғилиши бўлиб ўтди. Унда ваколат муддати якунига етган судьяларни ушбу лавозимда бўлишнинг навбатдаги муддатига, айрим судьяларни муқобиллик асосида ваколати муддати даврига қайта тайинлашга оид масалалар муҳокама қилиниб, тегишли қарорлар қабул қилинди. Судьялар олий кенгаши қарори билан: Юлдашев Илҳом Бобожонович – судьялик ваколати муддати даврига Бухоро вилояти Бухоро туманлараро иқтисодий судининг раиси лавозимига қайта тайинланди ва шу муносабат билан Бухоро вилоят судининг иқтисодий ишлар бўйича судьяси лавозимидан озод қилинди; Мамарасулов Ҳасан Болтабоевич – судьялик ваколати муддати даврининг беш йил муддатига Жиззах вилояти Фориш туман иқтисодий судининг раиси лавозимига қайта тайинланди ва шу муносабат билан Сирдарё вилоят судининг иқтисодий ишлар бўйича судьяси лавозимидан озод қилинди; Кушиев Ғуломжон Ёқубжонович – судьялик ваколати муддати даврининг беш йил муддатига Хоразм вилояти Урганч туманлараро маъмурий судининг раиси лавозимига қайта тайинланди ва шу муносабат билан Навоий вилоят маъмурий судининг судьяси лавозимидан озод қилинди; Буриев Азиз Абдукаимович – судьялик ваколати муддати даврига Тошкент шаҳар фуқаролик ишлари бўйича Яккасарой туманлараро судининг судьяси лавозимига қайта тайинланди ва шу муносабат билан Тошкент вилояти фуқаролик ишлари бўйича Чирчиқ туманлараро судининг судьяси лавозимидан озод қилинди. Хакимов Музафар Абдуллаевич – судьялик ваколати муддати даврига Самарқанд вилояти жиноят ишлари бўйича Пайариқ туман судининг судьяси лавозимига тайинланди. Шунингдек, ваколат муддати якунига етган: Соатов Дилшод Туйчиевич – судьялик лавозимида бўлишнинг навбатдаги ўн йиллик муддатига Наманган вилояти Чуст туманлараро иқтисодий судининг судьяси лавозимига; Очилов Дилмурод Мадаминович – судьялик лавозимида бўлишнинг навбатдаги ўн йиллик муддатига Навоий вилоят маъмурий судининг судьяси лавозимига; Матниязов Сардорбек Хожиназарович – судьялик лавозимида бўлишнинг навбатдаги ўн йиллик муддатига Тошкент шаҳар маъмурий судининг судьяси лавозимига; Хожиев Абдусаид Худайбердиевич – судьялик лавозимида бўлишнинг навбатдаги ўн йиллик муддатига Тошкент шаҳар маъмурий судининг судьяси лавозимига; Кудратов Аброр Хамидуллаевич – судьялик лавозимида бўлишнинг навбатдаги ўн йиллик муддатига Сирдарё вилояти Гулистон туманлараро маъмурий судининг судьяси лавозимига; Муминова Феруза Исмаиловна – судьялик лавозимида бўлишнинг навбатдаги ўн йиллик муддатига Тошкент вилояти фуқаролик ишлари бўйича Оҳангарон туманлараро судининг судьяси лавозимига; Махаммадиева Латофат Асқаровна – судьялик лавозимида бўлишнинг навбатдаги ўн йиллик муддатига Қашқадарё вилояти фуқаролик ишлари бўйича Қарши туманлараро судининг судьяси лавозимига; Набиев Мажид Садуллоевич – судьялик лавозимида бўлишнинг навбатдаги ўн йиллик, шундан беш йил муддатга Тошкент вилояти Бекобод туманлараро иқтисодий судининг раиси лавозимига; Жаббаров Толмас Рузимуродович – судьялик лавозимида бўлишнинг навбатдаги ўн йиллик муддатига Сурхондарё вилояти Шеробод туманлараро иқтисодий судининг судьяси лавозимига тайинланди. Бундан ташқари: Хашимов Рустам Фуркатович – судьялик лавозимида бўлишнинг беш йиллик муддатига Тошкент вилояти фуқаролик ишлари бўйича Чирчиқ туманлараро судининг судьяси лавозимига; Султанов Болат Рахманович – судьялик лавозимида бўлишнинг беш йиллик муддатига Тошкент вилояти жиноят ишлари бўйича Зангиота туман судининг судьяси лавозимига тайинланди. Судьялар олий кенгаши матбуот хизмати
Пойтахт судлари ва Кенгаш: яхши ташаббуснинг фаол қўллови
Тошкент шаҳар судлари ташаббуси Судьялар олий кенгаши томонидан фаол қўлланиши натижасида яхши тадбир бўлиб ўтди. Давра суҳбати шаклида ўтган тадбирда суд тизимидаги ислоҳотлар, мазкур тизим ва оммавий ахборот воситалари ҳамкорлиги, бу борадаги юзага келаётган муаммо ва уларнинг ечимлари хусусида фикр алмашилди. Мавзудан келиб чиқилса, тадбирда пойтахт судлари мутасаддилари ва оммавий ахборот воситалари ходимларигина иштирок этгани тасаввурга келади. Бироқ давра кенгроқ олиниб, унга адвокат-блогерлар, ҳуқуқ фаоллари ҳам таклиф этилдики, Судьялар олий мактабининг катта мажлислар зали деярли тўлиб, жонли мулоқот қисқа танаффус билан салкам уч соат давом этди. Қайд этилдики, мамлакатимизнинг барча жабҳалари қатори суд тизимида амалга оширилаётган ислоҳотларда очиқлик ва шаффофлик устувор йўналишга айланди. Чунки, мазкур тамойиллар судларга бўлган ишончни таъминловчи асосий омил ҳисобланади. Бундан ташқари судлар фаолияти самарадорлиги жамиятнинг унга бўлган ишончига ва суд қарорларининг ҳуқуқий асосларини тўғри тушунишига ҳам боғлиқ. Бу эса суд ишлари оммавий ахборот воситалари профессионал даражада ёритилишини тақазо этадики, шу нуқтаи назардан суд идоралари ва журналистларнинг конструктив ҳамкорлиги бугунги кун заруриятига айланган, дейиш мумкин. Давра суҳбатида судлар фаолиятига оид ғиж-ғиж рақамлар тилга олинмади ҳисоб, узундан-узоқ маърузалар ҳам қилинмади. Расмиятчиликдан анча нари ўтган тадбирда судлар фаолиятига аралашувлардан тортиб, суд ишларини кўришда жорий этилган янги тартиблар, оммавий ахборот воситаларда асосан жиноят ишлари бўйича судлар фаолияти кўпроқ ёритилаётгани-ю иқтисодий, фуқаролик ва маъмурий судларда фаолиятига ҳам кенгроқ ўрин бериш лозимлиги, судлар фаолиятига доир ахборот олиш ҳуқуқини таъминлашда юзага келаётган айрим тушунмовчиликлар ва уларнинг ечимлари борасида мантиқли мулоҳазалар айтилиб, ўринли таклифлар ўртага ташланди. Ижтимоий адолат барқарорлиги жамиятда ҳуқуқий маданият қанчалар шаклланганига ҳам боғлиқ, бу эса ҳуқуқий тарғибот ишлари самарадорлигини янада оширишни талаб қилади. Шундан келиб чиққан ҳолда ҳуқуқий тарғибот ишларини оммавий ахборот воситаларисиз самарали амалга оширишнинг деярли иложи йўқлиги эътироф этилиб, айни масала ҳамкорликнинг муҳим йўналишига айланиши ҳам алоҳида қайд этилди.
Ишонч телефони
Сизда ариза, шикоят ёки таклифлар мавжудми? Судьялар олий кенгашига ишонч телефонлари орқали мурожаат қилинг!
71 200-26-00 ёки 1190