Янгиликлар
Шукр қилиб, фикр қилиб...
Бундай тадбирлар кўп вақт олмайди, бироқ таассуроти анча пайтгача кишини тарк этмайди. Чунки, унда иштирок этган барчани деярли бир хил туйғулар, уйғун ҳислар чулғайдики, таассуроти узоқ давом этиши шунда. Яъниким, тадбир тўрида ўтирганлар машаққатли, аммо шарафли фаолияти қадрланаётганидан кўнгли тоғдек кўтарилса, уларнинг намунали умр йўлига ҳавас билан қараётган ҳамкасблари ўзларига ҳам шундай саодат насиб этишини ич-ичидан исташи аниқ. Бундай тадбирлар шукр-у фикр қилишга катта туртки бериши билан ҳам аҳамиятлидир. Гапнинг индаллосики, Судьялар олий кенгаши ташаббуси билан Истиқлол байрами муносабати билан мўъжазгина тадбир бўлиб ўтди. Унда барча вилоят ва унга тенглаштирилган судлар судьялари масофадан иштирок этди. Расмиятчиликдан анча йироқ ўтган тадбирда суд-ҳуқуқ соҳасида амалга оширилаётган ислоҳотлар, уларнинг натижалари ҳақли равишда эътироф этилди, намунали фаолияти билан тизимда катта ҳурматга қозонган фахрийларнинг кўплари бирма-бир тилга олинди. Шунингдек, бир гуруҳ фаол судьяларнинг меҳнатлари ҳам эътибор қаратилди. Якунда эса одил судловни амалга оширишда узоқ йиллар самарали фаолият кўрсатган 17 нафар фахрийга “Суд фахрийси” кўкрак нишони тантанали равишда топширилди. Уларнинг муносиб давомчилари бўлаётган 15 нафар судья эса Судьялар олий кенгашининг эсдалик совғалари билан рағбатлантирилди. Судьялар олий кенгаши матбуот хизимати
“Қабул-2023/2024”га оид рақамлар
Судьялар олий кенгаши ҳузуридаги Судьялар олий мактабининг Судьялик лавозимларига номзодларни тайёрлаш курси 2023/2024 ўқув йили учун жами 150 нафар тингловчи қабул қилинди. Уларнинг: 46 нафари – жиноят ҳуқуқи; 46 нафари – фуқаролик ҳуқуқи; 30 нафари – иқтисодий ҳуқуқ; 28 нафари - маъмурий ҳуқуқ ихтисослиги бўйича таҳсил олади. Қабул қилинганларнинг 111 нафари (74 фоиз) эркак, 39 (26 фоиз) нафари хотин-қизлардир. Тингловчиларнинг 39 нафари – 34 ёшда; 35 – 40 ёш оралиғидагилар 93 нафарни, 41-45 ёш оралиғидагилар 16 нафарни ташкил этади. Шунингдек, 1 нафар тингловчининг ёши 47да бўлса, яна 1 нафари шу йил 50 ёшни қарши олган. Ҳудудлар кесими таҳлилига кўра, энг кўп тингловчи Тошкент шаҳрига тўғри келади: 36 нафар (24 фоиз). Пойтахтдан кейинги ўринларни Қашқадарё (18 нафар ёки 12 фоиз) ва Фарғона (16 нафар ёки 10,7 фоиз) вилоятлари эгаллаган. Самарқанд ва Хоразм вилоятининг кўрсатгичлари бир хил (10 нафардан ёки 6,7 фоиздан) Қолган вилоятлардан ўқишга кирганлар 5 -7 нафарни ( 3,3 – 4,7 фоиз ) ташкил қилади. Энг кам тингловчи Тошкент вилоятидан: 4 нафар (2,7 фоиз). Қабул қилинганларнинг 90 нафари (60 фоиз) суд органлари ходимлари ҳисобланади. Адлия, прокуратура ва Ички ишлар органлари ходимлари жами 23 нафарни ёки 22 фоизни ташкил қилади (19 – 12,7%; 9 – 6%; 5 – 3,3%). Шунингдек, турли давлат органлари ва ташкилотларида ҳуқуқшунос сифатида фаолият кўрсатиб келаётган 17 нафар юрист, 7 нафар адвокат, 2 нафар нотариус ҳам тингловчилар сафидан жой олган.
Биринчидан, “номзод” эмас, “талабгор”! Иккинчидан...
Судьялар олий кенгаши ҳузуридаги Судьялар олий мактабининг Судьялик лавозимларига номзодларни тайёрлаш курсига кириш синовларининг ҳар бир босқичи натижалари Кенгаш ахборот ресурсларида эълон қилиб борилар экан, ижтимоий тармоқларда улар билан боғлиқ турли фикрлар билдирилмоқда. Хусусан, кириш синовларининг иншо босқичида айрим талабгорлар “0” (ноль) балл олгани турли баҳс-мунозараларга сабаб бўлмоқдаки, билдирилаётган аксарият фикрларнинг мазмуни шундай: мана, судьяликкка номзодларнинг аҳвол-савияси, эртага шулар инсон тақдирини ҳал қиладими, қонун устуворлигини шулар таъминлайдими?.. Бундай талқин, бундай ёндашув масала моҳиятини англамасдан бонг уриб, жамоатчиликни чалғитишдан бошқа нарса эмас. Биринчидан, Судьялик лавозимларига номзодларни тайёрлаш курсига кириш синовларини топшираётганлар, кўпгина хабарларда урғу берилаётгани каби “судьяликка номзод”лар эмас, балки талабгор (янаям ҳижжалаб тушунтирилса – абитуриент!) ҳисобланади. Талабгорнинг “судьяликка номзод” бўлиши учун: 1.Кириш синовларидан муваффақиятли ўтиб, Судьялик лавозимларига номзодларни тайёрлаш курси тингловчиси бўлиши; 2.Судьялик лавозимларига номзодларни тайёрлаш курсини муваффақиятли битириши шарт(таҳсил давомийлиги 1 йил)! Яъни, шу босқичлардан ўтган мутахссисгина “судьяликка номзод” бўлиши мумкин. Бироқ шундаям судьялик лавозими кафолатланмайди. Олдинда яна бир довон борки, энди номзод Судьялар олий кенгаши томонидан ўтказиладиган бўш судьялик лавозимлари учун очиқ танловда иштирок этиши керак. Очиқ танлов муқобиллик асосида ўтказилиб, муносибларгина судьялик лавозимига тайинланаётгани жамоатчиликка маълум. Энди кириш синовларининг иншо босқичида “0” балл олган талабгорлар масласига изоҳ беришдан аввал мавжуд тартиб ва қоидаларни яна бир марта эсга олсак. Кириш синовларининг иншо босқичида 50 тадан ортиқ мавзулар ичидан 3 таси талабгорлар томонидан ёпиқ конвертлар орасидан таваккалчилик асосида танлаб олиниши ҳақида илгари ҳам маълумот берилганди. Шунингдек, танлаб олинган мавзулар бўйича ёзилган иншо дафтарларининг муқоваси олиниб, биринчи варағига махсус шифр қўйилган ҳолда (шу тариқа талабгорлар шахссизлантирилади, бундан мақсад холисликни таъминлаш, турли шубҳа ва коррупцион ҳолатларнинг олдини олишдир) махсус баҳоловчи комиссияга топширилиши, иншо ёзилган дафтар варақларига (муқовасига эмас) талабгор ўз исми-шарифини ёзиши ёки бирор бир кўзга яққол ташланадиган белги қўйиши мумкин эмаслиги ҳам айтилиб, акс ҳолда, “0” балл қўйилиши ҳақида огоҳлантирилган. Бахтга қарши, кириш синовларининг айни шу босқичида 8 нафар талабгорга (уларнинг бир нафари иншо дафтарини топширмай, ўзи билан олиб кетган!), жорий тартибларга риоя қилмагани учун, “0” балл қўйилди. Алқисса, мазкур балл уларнинг билим-салоҳиятини акс эттирмайди, балки тартиб-қоидаларга риоя этилмаганининг аччиқ ҳосиласи, холос. Судьялар олий кенгаши матбуот хизмати
Ишонч телефони
Сизда ариза, шикоят ёки таклифлар мавжудми? Судьялар олий кенгашига ишонч телефонлари орқали мурожаат қилинг!
71 200-26-00 ёки 1190